პირის დაცვა ადმინისტრაციული პატიმრობის საქმეზე წარმოადგენს იურიდიული დახმარების სამსახურის ერთ-ერთ მნიშვნელოვან ფუნქციას. 

იურიდიული დახმარების სამსახური ადმინისტრაციული პატიმრობის საქმეზე საკუთარი უფლებების დასაცავად პირებს სთავაზობს უფასო იურიდიულ კონსულტაციას. მათ შეუძლიათ ისარგებლონ როგორც პირადი ასევე სატელეფონო/ონლაინ კონსულტაციის სერვისებით. იურიდიული დახმარების სამსახური ადმინისტრაციული სამართალდარღვევის საქმეზე უფასო საადვოკატო მომსახურებას ახორციელებს, თუ ადვოკატის დანიშვნას მოითხოვს ის გადახდისუუნარო პირი, რომლის მიმართაც მიმდინარეობს წარმოება იმ საქმეზე, რომლისთვისაც სახდელის ერთ-ერთ სახედ გათვალისწინებულია ადმინისტრაციული პატიმრობა და თუ საქმეში არ მონაწილებს მის მიერ აყვანილი ადვოკატი.

ადმინისტრაციულ პასუხისგებაში მიცემულ პირს უფლება აქვს:

• გაეცნოს საქმის მასალებს;
• მისცეს ახსნა-განმარტება;
• წარადგინოს მტკიცებულება;
• განაცხადოს შუამდგომლობა;
• საქმის განხილვისას ისარგებლოს ადვოკატის იურიდიული დახმარებით;
• გამოვიდეს მშობლიურ ენაზე და თუ არ იცის მიმდინარე წარმოების ენა, ისარგებლოს თარჯიმნის მომსახურებით;
• გაასაჩივროს მიღებული დადგენილება.

ადმინისტრაციული სამართალდარღვევის საქმე განიხილება იმ პირის თანდასწრებით, რომელიც მიცემულია ადმინისტრაციულ პასუხისგებაში. ამ პირის დაუსწრებლად საქმე შეიძლება განხილულ იქნეს მხოლოდ ისეთ შემთხვევებში, როდესაც არსებობს ცნობა მისთვის საქმის განხილვის ადგილისა და დროის დროული შეტყობინების შესახებ, თუმცა მისგან არ შემოსულა შუამდგომლობა საქმის განხილვის გადადების თაობაზე.

ადმინისტრაციული პატიმრობის ვადა არ შეიძლება იყოს 15 დღეზე მეტი. ადმინისტრაციული პატიმრობა არ შეიძლება შეეფარდოთ ორსულ ქალებს, დედებს, რომლებსაც ჰყავთ 12 წლამდე ასაკის ბავშვები, 18 წლის ასაკს მიუღწეველ პირებს, პირველი და მეორე ჯგუფის შეზღუდული შესაძლებლობის სტატუსის მქონე პირებს.

ადმინიტრაციული პატიმრობა გამოიყენება ისეთ სამართალდარღვევებზე, როგორებიცაა წვრილმანი ხულიგნობა; სამიჯნე ნიშნის მოშლა, დაზიანება ან სასაზღვრო ზოლის თვითნებური შეცვლა; შემაკავებელი ან დამცავი ორდერით გათვალისწინებული მოთხოვნებისა და  ვალდებულებების შეუსრულებლობა და სხვა.

სამართლებრივი აქტები

• საქართველოს კონსტიტუცია
• ადამიანის უფლებათა და ძირითად თავისუფლებათა დაცვის კონვეცია
• საერთაშორისო პაქტი სამოქალაქო და პოლიტიკური უფლებების შესახებ
• ეკონომიკური, სოციალური და კულტურული უფლებების შესახებ საერთაშორისო პაქტი
• საქართველოს ადმინისტრაციულ სამართალდარღვევათა კოდექსი
• „იურიდიული დახმარების შესახებ“ საქართველოს კანონი
• „ადვოკატთა შესახებ“ საქართველოს კანონი
• საქართველოს მთავრობის №424 დადგენილება - „პირის გადახდისუუნარობის დადასტურების წესის განსაზღვრის შესახებ“
• იურიდიული დახმარების საბჭოს №20 გადაწყვეტილება - საჯარო სამართლის იურიდიული პირის – იურიდიული დახმარების სამსახურის დებულების დამტკიცების შესახებ
• იურიდიული დახმარების საბჭოს №27 გადაწყვეტილება - „იურიდიული დახმარების შესახებ“ საქართველოს კანონის მე-5 მუხლის მე-3 პუნქტით გათვალისწინებული იურიდიული დახმარების გაწევის კრიტერიუმების დამტკიცების შესახებ
• ადვოკატთა პროფესიული ეთიკის კოდექსი

მომსახურების ფარგლები

სამოქალაქო ან/და ადმინისტრაციულ საქმეზე მუშაობისას, იურიდიული დახმარების სამსახურის საზოგადოებრივი ადვოკატი, როგორც წესი, ახორციელებს შემდეგ მოქმედებებს:

• ეცნობა ინფორმაციას და საქმის მასალებს წარმოებაში მიღებული საქმეების შესახებ;
• ხვდება დასაცავ პირს და უწევს სამართლებრივ კონსულტაციას;
• აანალიზებს საქმესთან დაკავშირებულ ინფორმაციას და უზრუნველყოფს საქმის წარმატებით წარმართვისათვის მტკიცებულებების შეგროვებას და წარდგენას შესაბამის უწყებაში ან სასამართლოში;
• წარმოადგენს დასაცავ პირს სასამართლოში;
• ადგენს საქმესთან დაკავშირებულ სამართლებრივ დოკუმენტებს – განცხადებებს, სარჩელებს, შესაგებლებს, საჩივრებს, მიმართვებს, შუამდგომლობებს და ა.შ.;
• ახდენს დასაცავი პირის და, საჭიროების შემთხვევაში, მისი კანონიერი წარმომადგენლის ინფორმირებას საქმის მიმდინარეობასთან დაკავშირებით.

მომსახურებით სარგებლობის პირობები